مفتاح الزجل المغربي

بَنَتْ الدَّارْ العَالْيَة

عَنَّقْتْ ظَلِّي، و بَسْتُه بُوسَة

شَفْتْ فْ عَيْنيهْ وُ بَانْ لِي صْفَرْ

ڨالْ لِيَّ : الخُطَّة فْ رَاسَكْ مَدْرُوسَة

تْعَنَّقْنِي وَ كُلَّكْ غْدَرْ!

خَرَّجْنِي مَنْ حْيَاتَكْ الْمَنْحُوسَة

دْفَنْ رَاسَكْ وَ دْفَنِّي فْ قْبَرْ .

سَوّلْتْ ذِيكْ الَحْرُوفْ

الْمَسْكونَة بَ الْخُوفْ

سَوّلْت الغَيْمَة البَاكْيَة

سَوَّلْت الكَلْمَة الشَّاكْيَة

سَوَّلْت السَّما عَ الَوْجَهْ الَحْزينْ

سَوَّلْتْ المَا عَ الْهَمّ وَ الضّيمْ

سَوَّلْتْ نَغْمَة خارْجَة مَنْ ذاكْ الجُّوفْ

سَوَّلْتْ وَشْمَة مَنْحوتَة بَ الْهَمّ وَ الْخوفْ

مينَة بْحَرْ باكي بَ الدّمُوعْ

مينة صْبَرْ وَ الرّجَا مَقْطوعْ

مينة عَيْطَة مَبْحُوحَة

المزيد

ـــــــــــــــــــــــــــــــــــــــــــــــــــــــــ

التصنيفات : غير مصنف |

أرسل الإدراج

دوّن الإدراج

لا يوجد تعليق

حْرُوفْ مَنْقُوشَة فَ الظْلامْ

فْ اليُومْ العالَمِي للْكَرَامَة

نَظّمَتْ لْ راسِي تَكْرِيمْ مْنََوّرْ

رَكَّبْتْ لْ فُمِّي كْمَامَة

وَ قْطَعْتْ لسانِي لِي كَيَهْضَرْ  

حْجَرْ الَّدْنَيا وَ هْمُومْهَا

مْرَاكْمَة فُوڨْ الصْدَرْ

حَرْ السْمَا وُ شومْهَا

يَكْوِي وَ يَعْمِي الَبْصَرْ

النَّارْ فْ الرَّاسْ تَڨدِي

وُ ڨلبِي مَسْكِينْ يا وَعْدِي

شاعْلة عْوَافِيهْ

سالَى وَ تْقَاضَى جَهْدِي

وَ أنا يَا حَسْرَة وَحْدِي

جُرْحِي شْكُونْ يَدَاوِيهْ؟

جُرْحِي فْ الظْهَرْ مْصَدِّي

وَ الهَمْ مَحْفُورْ فْ جَلْدِي

وَ تَنْوَاحِي شكونْ سْمَعْ لِهْ؟

لَوْ كانْ الحَلْ بِ يَدِّي

كُنَتْ نَفْسَخْ جَلْدِي

وَ النَّاسْ تَدْفَ بِهْ

وَ ذاكْ الظَّالَمْ الَمْعَدِّي

نْشَعَّلْ فيهْ نارْ حَقْدِي

وَ ب ْيَدِّي نَشْوِيهْ.

الَبْكَا وْرَا الْمَيَّتْ خْسَارَة

وَ الزْيَادَة مَنْ رَاسْ الَحْمَقْ

اِلا الخَيَّالَة دَكَّتْ الَعْمَارَة

الَمْكَاحَلْ بَ البَارُودْ تَطْلَقْ

حْمَارِي وُقَفْ فْ العَڨبَة

وَ عْطَى حْمَارُه

تَقَوَّسْ ظَهْرُه فْ الشَّعْبَة

وَ تَخْلاتْ دارُه

رْكَلَتْ حْمَارِي وَ نْغَزْتُه

ڨلتْ لِهْ : سيرْ بِيَ يا الَحْمَارْ

مَنْ فَقْصْتِي عْلِيهْ رْكَلْتُه

ڨالْ لِيَ : شْكُونْ فينا الَحْمَارْ !

الْحَبْسْ وَ السِيلُونْ

التَّعْلاقْ بَ الشّيفونْ

الْعَلْفْ بَ الرَسْيُونْ

وَ الحَقْ ڨالُوا مَطْحُونْ

الفَلَقَة وَ التَّعْلاقْ

وَ الشِّيفُونْ مَعْفُونْ

الرُّكْنَة وَ الْغَبَّاقْ

وَ الحَبَسْ مَسْكُونْ

الجَّلْدْ اِلا طاقْ

وَ المَلَحْ مَذْهُونْ

يَزِيدُوهْ التَّعْلاقْ

حتّى الجَّهَدْ يَخُونْ

جَهْدَكْ قليلْ يا حُمَّانْ

وَسَطْ غابَة طْيُورْهَا نْسُورَة

وَ الضُّعَفْ فِيكْ اِلا بَانْ

مْعَذَّبْ ذاتَكْ مَضْرُورَة.

كَبْلُوهْ وَ حَزْمُوهْ مَنْ اليَدِّينْ

بَ الخَيَشْ غَمْضُوا لِهْ الْعَيْنِينْ

عَرَّاوَهْ وَ بَانْ المَسْتُورْ

رَشُّوهْ بَ مَاء بَايَتْ فْ الڨَمْرَة

مْحَابْسِي بَ الذَّلْ مَحْگورْ

ما غَطَّاوَهْ مَا سَتْرُوا لِهْ عَوْرَة

الرَّعْدَة ، الحُگرَة وَ قَلَّة الجَّهْدْ

الظُّلْمْ وَ القَهْرَة مَا لِهُمْ حَدْ

الفَلَقَة تَعَلْمَكْ تَحْبُو

وَ تَفَكْرَكْ فْ ايَّامْ الرْضَاعَة

تَعَلْمَكْ تْوَلِّي كَلْبُه

تَنْبَحْ وَ كُلَّكْ طاعَة

وَ تَبْرَكْ وَحْدَكْ يَا مَسْكِينْ

الدَصْ، الجُّوعْ وَ الَبْرُودَة

اِلا وْقَفْتِ ما تَلْقَى رَجْلِينْ

تَقَلَّدْ فْ وُقُوفَكْ الَقْرُودَة

سَطْلَة صْغِيرَة مَنْهَا تَشْرُبْ

وُ فيهَا تَقْضِي الحَاجَة

الصُّورْ عالي لا تَفَكَّرْ تَهْرُبْ

راكْ فْ نْهَارَكْ تَوَلِّي خْرَاجَة

الظَّلْمَة لِيلْ وَ نْهَارْ

الفَارْ وَ الرْتِيلَة جِيرانَكْ

تَحْكِي لِهُمْ ما صارْ

سَرْ الكَيَّة وَ مْحَانَكْ

ما تَعْرَفْ ليلْ مَنْ نْهَارْ

ما تَفْرَزْ حْرُوفْ جَلاَّدَكْ

فْ حَبَسْ انْتَ وَ لاَّ فْ غارْ

وَ لاَّ بْعِيدْ عْلىَ بْلادَكْ

اِلا بْغَى يَبْرَكْ …

ما يَصِيبْ ڨاعْ يَبْرَكْ عْلِيهْ

اِلا كْتَابْ وَ تَحَرَّكْ

لَحْمُه بَ الَعْصَا يَوْجَعْ فِيهْ

ايهْ علْيِكْ يا دَنْيَا

وَ ْعَلى غَدْرَكْ

تَكْوِي بْحَالْ الحَيَّة

وَ السَمْ مَنْ شَرَّكْ

وَ فْ هذا الزْمَانْ …

كُلْهَا وُ فينْ جَاتُه

شي راكَبْ عَ الَمْحَانْ

شي الَمْحَانْ عَيَّاتُه

شي بايَتْ عَرْيَانْ

شي دافي فَ كْسَاتُه

شي غادي حَفْيَانْ

شي مَسَبَّطْ فْ جْرَاتُه

 ايهْ عْلِيكْ يا حُمََّانْ !

وُ فينْ رَاڨدْ اليُومْ

الظَّلْمَة وَ التَّخْمَامْ

وَ الهَمْ فِيكْ مَرْدُومْ

الفَلَقَة وُ الَعْصَا

وَ الذَّلْ فيكْ نَخْصَة

نابْتَة فْ الَعْرُوقْ

الڨلبْ بِهَا مَشْنُوقْ.

بْرَكْ فْ الظلْمَة …

يَرَارِي بَ اليَدْ جْرَاحُه

يَتْخَيَّلْهَا حَلْمَة

مَطْلُوقْ فيهَا سْرَاحُه

وَ سْمَعْ كلامْ وْرَا الَحْيُوطْ

وَ عْرَفْ شكونْ هُوَ

هذا الباشا ذاكْ المَسْخُوطْ

على بابُه نْطَقْ وَ دْوَى :

          ۔ فينَكْ يا الَحْمِينْ   

            وَ فينْ الزْعَامَة

            رَدِّيتْ لِكْ الدِّينْ

            وَ شَرَّبْتَكْ النْدَامَة

            وَرِّيتَكْ وَ وَرِّيتْ جْمِيعْ النَّاسْ

            كيف يَعَرْفُوا قيَاسْهُمْ

            ما يَطَمْعُوا فْ ذْهَبْ وَ لا مَاسْ

            يَحَلْمُوا عْلَى ڨدْ لْبَاسْهُمْ

            وَرِّيتَكْ النَّخْلَة تَبْقَى نَخْلَة

            وَخَّا يَطِيحْ جْرِيدْهَا

            وَ العَتْلَة تَبْقَى عَتْلَة

            يَرْشَى وَ يَصَدِّي حْدِيدْهَا

            وَرِّيتَكْ وُ مازالْ نْوَرِّيكْ

            وَ الا بْرِيتِي نَزِيدَكْ وُ نَعْطِيكْ

            انا هْنَا بَاسْمِيَّة الَفْرَنْسِيسْ

            فْ هذا الدُوَّارْ حَاكَمْ

            كُلْ شِي بْ ثَمَانْ ، غالِي وَ لاَّ رْخِيصْ

            رْوَى كلامِي يا الفَاهَمْ

            وَ انْتَ يا الَحْمِينْ التَرَّاسْ

            مَا حْصَدْتِ غيرْ صْدَاعْ الرَّاسْ

            الَكْسِيبَة لِي شَڨاتْ طريقْ الَعْزِيبْ

            اليُومْ رْجُوعْهَا للدُوَّارْ

            وُ الَبْنِيّة لِّي كُنْتِ عَنْدَهَا حْبِيبْ

            غَدّا زْواجْهَا مَنْ العَطّارْ

            وُ ذوكْ الرْفَاڨ يا الَحْمِينْ

            لِي بَ كلامَكْ سَابُوا

            بَاسُوا الرْجَلْ وَ اليَدِّينْ

            وُ ڨدَّامْ الجْمَاعَة تَابُوا

            وَ بَقِيتِي وَحْدَكْ يَا مَسْكِينْ

            جَفَّافْ هذا الَمْكَانْ

            الظلامْ رْفِيقَكْ يَا الَحْمِينْ

            تْفِيقْ وَ تْتبَاتْ بَ لَحْزَانْ

            لِي مَا عَنْدُه هَمْ

       تَوَلْدُه لِهْ حْمَارْتُه               

            لِي وْعَى فْ الدَّنْيَا وَ فْهَمْ

المزيد

ـــــــــــــــــــــــــــــــــــــــــــــــــــــــــ

التصنيفات : غير مصنف |

أرسل الإدراج

دوّن الإدراج

لا يوجد تعليق

النَّاسْ نُقْرَة وَ نْحَاسْ

راسِي مْشَحّمْ شَلَّة أفْكَارْ

ثَقَّلْ عْلِيَّ وَلّيتْ حْمَارْ

بَ الفَقْصَة نَمْضَغْ الَكْلامْ  بَ هْمُومْ

وَ فْ خْرُوجُه يَتْعَصَّرْ فُمّي المَعْصُومْ

الْحَرْثْ فْ الرَّاسْ

وَ الَحْصَادْ فَ الڨلبْ

بَ الَمْدَرَة وَ الفَاسْ

حتَّى الرَّاسْ تَغْلَبْ

الغَلَّة شُوكْ

بَ الهَمْ مَحْسُوكْ

وَ النَّاسْ هِيَ النَّاسْ

مَرَّة قَصْدِيرْ مَرَّة نْحَاسْ

تَشْرَبْ الهَمْ وَ لِيَّاسْ

وَ تَذُّوقْ الَمْرَارْ بْلا قْيَاسْ

هذا تُوبُه عْلَى ڨَدْ جُوعُه

وَخَّا الجُّوعْ يَعَشَّشْ فْ ضْلُوعُه

وَ الطِّيرْ الحُرْ ما يَبِيعْ تُوبُه

ما يَڨْلَبْ قَشَّابَة

ما يَسَمَّرْ نْعَالَة فْ هْرُوبُه

ما يَكَحََّل بَ ضْبَابَة

ما يَخَلِّي الجُّوعْ بَ الّلجَامْ

يَرْكَبْ عْلِيهْ

ما يَخَلِّي لڨْمَة الَحْرَامْ

فْ الَحْلالْ تَنَّسِيهْ

الطِّيرْ الحُرْ، ما يَغَمَّضْ عَيْنْ

وَ يَڨولْ: راسِي يا راسِي

نُقْرَة صَافْيَة وَ ڨلَبْ حْنِينْ

يَڨولْ: ناسِي يَا ناسِي

هُوَ دَگْ مَنْ نُقْرَة

ضاعَتْ فْ هذا الزْمَانْ

بَ ظُلْمْ النَّاسْ وَ الحُگْرَة

قَلَّة العَفَّة وَ الَحْسَانْ

وَ النَّاسْ هِيَ النَّاسْ

مَرَّة قَصْدِيرْ مَرَّة نْحَاسْ

وَ الذْهَبْ فْ مَعْدَنْ بنادَمْ قْلِيلْ

القَصْدِيرْ وَ الصْدَا وَ الَبْهُوتْ يَسِيلْ

المزيد

ـــــــــــــــــــــــــــــــــــــــــــــــــــــــــ

التصنيفات : غير مصنف |

أرسل الإدراج

دوّن الإدراج

لا يوجد تعليق

             كْرَهَتْ الظُّلْمْ وَ الظَّالَمْ

             كْرَهَتْ عِيشَة « عَدِّي »

             كْرَهَتْ الْمَحْگورْ وَ الحَالَمْ

             كْرَهَتْ الدْرَاعْ الَمْصَدِّي

             كْرَهَتْ الجْنَاحْ الَمْهَرَّسْ

             كْرَهَتْ قَلَّة الحِيلَة

             كْرَهَتْ الفُمْ الَمْفَرْنَسْ

             يَضْحَكْ ضَحْكَة ذْلِيلَة

             كْرَهَتْ القَشَّابَة المَڨلوبَة

             كْرَهَتْ الْغَمْزَة بَ التْمَحْلِيسْ

             كْرَهَتْ الرُّجْلة المَعْيُوبَة

             كْرَهَتْ الضَّحْكَة بَ التْفَرْنِيسْ

             كْرَهَتْ الرَّاسْ الَمْطَاطِي بَ الخُوفْ

             كْرَهَتْ العُنُقْ الَمْدَلِّي

             كْرَهَتْ لِي يَتْفَرَّجْ وَ يَشُوفْ

             كِيفْ حَقُّه مْتَلِّي

             كْرَهَتْ الغَارَقْ فْ الدُّوخَة

             ڨالْ :يَنَسَِّي الَهْمُومْ

             عايَشْ عِيشَة مَمْسُوخَة

             عْلَى كْلامْ الحَقّ مَفْطُومْ

             كْرَهَتْ الدَّاَخَلْ سُوقْ راسُه

             ضَارَبْ الدنيا رَكْلَة 

             غارَقْ وَ زايَدْ فْ نْعَاسُه

             مَعَشَّة فْ لسَانُه خَمْلَة

             لِّي زْرَعْ الخُوفْ يَحْصَدْ الذَّلْ 

             وَ الَبْكَا وْرَا الحَقْ خْسَارَة

             الزِّيَادَة ڨالُوا مَنْ رَاسْ الَبْغَلْ

             رْكَلْ النَّعْمَة وَ تْبَعْ الَحْمَارَة.

             تَمَنِّيتْ يَا سِيدْ الوَالِي  

المزيد

ـــــــــــــــــــــــــــــــــــــــــــــــــــــــــ

التصنيفات : غير مصنف |

أرسل الإدراج

دوّن الإدراج

لا يوجد تعليق

                - أنَا كْتَابْ يَتَقْرَا    

            حْرُوفُه خَوْفْ وَ عْذَابْ

            سْطُورُه عَافْيِة جَمْرَة

            وَ وْرَاقُه بَاهْتَة ضْبَابْ

            أنا قْصِيدَة مَا لِهَا مِيزانْ

            خاوْيَة مَنْ الْمَعْنَى

            ما لِهَا لُغَة ما لِهَا اوْطانْ

            السَّرْ فِيهَا مَنْ المَحْنَة

            أنا لوحَة الْوَانْهَا بَاهْتَة

            مَرْسُومَة فْ الظلامْ

            صُورَة تَنْطَقْ وُ هِيَ سَاكْتَة

            بَكْمَة وُ كُلْهَا كلامْ

            أنا شَجْرَة وَسَطْ غابَة

            ما فيها اغْصَانْ ما تَعْطِي ظَلْ

            النَّاسْ فيهَا حَطَّابَة

            حتّى جْذُورْ ڨلبَهَا ذْبَلْ

            أنَا بِيرْ بَ الدَّمْعَة مَحْفُورْ

            مَنْ الڨاعْ خَاوِي

            لَّي شْرَبْ مَنْ مَايَا مَضْرُورْ

            وُ لِي بَعَّدْ يَبْقَى رَاوِي

            أنا قْبَرْ لِي تْعَذَّب وُ مَاتْ

المزيد

ـــــــــــــــــــــــــــــــــــــــــــــــــــــــــ

التصنيفات : غير مصنف |

أرسل الإدراج

دوّن الإدراج

لا يوجد تعليق

يَحْلَمْ وَ ْيزيدْ فْ احْلامُه

يَرْسَمْها جنّة ڨدّامُه

يْشوفْ َبنْتْ« حَمُّو مَزْوارْ»

لابْسَة توبْ حْلالَه

عْروسَة و عْمارَّة الدّارْ

مْضَوْيَة العَشّ دْيالُه

يَحْلم بْ الاولادْ

تحْرَثْ البلادْ

ما يَحْنيوْا رَڨْبَة لْلدّراعْ اِلا تْجَبّرْ

يَبْنِيوْها طوبَة تْعَشّشْ و تْعَمّرْ

يْڨلْعوا نَبْتَة الخوفْ

المْعَرّْشَة فْ الجّوفْ

يْطَلْبوا الشّتَا اِلا غابَتْ

يْدَفْنُوا الحُگْرَة اِلا سَابَتْ

يَحْلَمْ وَ يْزيدْ فْ احْلامُه

يَرْسَمْها جَنَّة ڨدَّامُه

يْشوفْها خيرْ وَ سْلامْ

ما هِيَ سْرابْ ما هِيَ اوْهَامْ

حاضْنَة اوْلادْها فْ وْجَهْ الرِّّيحْ

تَتْعَكَّلْ فْ طَريقْها تْميلْ وَ تْطِّيحْ

ما تْفَرَّطْ فْ ذوكْ الصَّّبْيَانْ

تْعَلَّمْهُمْ كيفْ يْطَّوْعُوا الَمْحانْ

تْعَلَّمْهُمْ الحَا : حُ

فْ سْمَا الَقْيُودْ

تْعَلَّمْهُمْ الرَّا : رِ

فْ الحَقّ الْمَرْفُودْ

تْعَلَّمْهُمْ اليَا : يَ

فْ البَابْ المَسْدُودْ

تْعَلَّمْهُمْ التَا : ة

فْ ضَحْكَة الَخْدُودْ

وَ يَبْقَى كْلامْها …

المزيد

ـــــــــــــــــــــــــــــــــــــــــــــــــــــــــ

التصنيفات : غير مصنف |

أرسل الإدراج

دوّن الإدراج

لا يوجد تعليق

سْبُولَة الْخُوفْ لَمْعَرْشَة فْ الجُّوفْ

وْقَفْتْ ڨُدَّامْ الَمْرَايَا

شَفْتْ وَجْهِي وَ رْكَبْنِي الخُوفْ

غَوَّّتْ(5) غَوْتَة، تْهَرْسَتْ الَمْرَايَا وْ طاحُوا الشقُوفْ

شَفْتْ فِيهَا مَنْ جْدِيدْ، لْقِيتْ ثلاثة العَيْنِينْ وَ قْلالْ الشّوفْ

سَتَّة الاذْنِينْ طْوَالْ وَ رَبْعَة النيُّوفْ،

وَ فُمْ وَاحَدْ مَسْدُودْ وَ مْكَفَّنْ بَ الصُّوفْ.

الَكْلامْ بْ رِيشَة الخُّوفْ مَرْسُومْ

وَ الَحْرُوفْ عايْمَة فْ مْدادْ مَسْمومْ

وَ النَّظْرَة بْ الَمْحَانْ مْشَبَّّكْ الْوَانْها

المزيد

ـــــــــــــــــــــــــــــــــــــــــــــــــــــــــ

التصنيفات : غير مصنف |

أرسل الإدراج

دوّن الإدراج

لا يوجد تعليق