فتحت كتابي نتهجَّى لوقاتْ

وراق هي ناقصَة من صَفْحاتُه

نشوفْ بينْ حروفُه فْ لي فاتْ

مْرَمَّة لهْمُومْ لي طَرْزاتُه

الحرف مخاصَمْ لحْرَيْفَاتْ

و لَمْدادْ جَفْ فْ دْوايْتُه

خطوط هي و ما تسَكْداتْ

تَصْعابْ الشُّوفَة فَ قْرَايْتُه

الكتابْ مَحْلولْ ما فِيهْ دَفَّاتْ

مازالْ نَتْسَنَّاوْا نهايْتُه.

كتابي مَجْمَرْ زانْدَة عْوَافيهْ

كتابي قلُمْ مْصَدِّي

مْرَايَا هَمِّي نْشُوفْ فيهْ

و الصّبَرْ مْعَايا غِيرْ كَ يْعَدِّي

كتابي فْ صَفْحاتُه مَضْيُومْ

الوَرْقَة تَزْحَمْ بَ الحْروفْ حامْلَة

عَنْدها الرَّاقَدْ فْ يومُه مَعْدومْ

وَحْلَتْ فَ خْرُوجُه كْدَا مَنْ قابْلَة

كتابي طَجَّتْ الفَرْحَة بين وُراقُه

الحَرْفْ يعَدَّدْ و يَنْدَبْ مع الرَّغايَة

يبكي الخَطْ لَمْسَكَّدْ على فْراقُه

السَّرْ فَ الهَمْ لَمْعَشَّشْ حْدايَا

وُ مْنينْ جاكْ هذا السَّعَدْ يا كْتابِي

وُ مْنِينْ جاك هذا الزْهَرْ الرَّاَقدْ

لَقْرَايَة فَ دُواخْلَكْ زادَتْ تَعْذابِي

كتابي مَنْ ضايَة الَهْمُومْ وارَدْ

كتابي مْجَلَّدْ غُلافُه بْ عَدِّي

وُ لونْ حْرُوفُه بَ الدموعْ

الزْهَرْ لَعْوَجْ فيه مْنَدِّي

حروفْ الهَمْ لِّي فْ الضْلوعْ

مَلِّيتَكْ يا كتابي

وُ مَلِّيتْ الشُّوفَة فيكْ

انْتَ سّرْ تَعْذابِي

وُقْتاشْ نَمْشي وُ نَسْمَحْ فِيكْ؟

 

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج