بَنَتْ الدَّارْ العَالْيَة

عَنَّقْتْ ظَلِّي، و بَسْتُه بُوسَة

شَفْتْ فْ عَيْنيهْ وُ بَانْ لِي صْفَرْ

ڨالْ لِيَّ : الخُطَّة فْ رَاسَكْ مَدْرُوسَة

تْعَنَّقْنِي وَ كُلَّكْ غْدَرْ!

خَرَّجْنِي مَنْ حْيَاتَكْ الْمَنْحُوسَة

دْفَنْ رَاسَكْ وَ دْفَنِّي فْ قْبَرْ .

سَوّلْتْ ذِيكْ الَحْرُوفْ

الْمَسْكونَة بَ الْخُوفْ

سَوّلْت الغَيْمَة البَاكْيَة

سَوَّلْت الكَلْمَة الشَّاكْيَة

سَوَّلْت السَّما عَ الَوْجَهْ الَحْزينْ

سَوَّلْتْ المَا عَ الْهَمّ وَ الضّيمْ

سَوَّلْتْ نَغْمَة خارْجَة مَنْ ذاكْ الجُّوفْ

سَوَّلْتْ وَشْمَة مَنْحوتَة بَ الْهَمّ وَ الْخوفْ

مينَة بْحَرْ باكي بَ الدّمُوعْ

مينة صْبَرْ وَ الرّجَا مَقْطوعْ

مينة عَيْطَة مَبْحُوحَة

خارْجَة مَنْ صَوْتْ حْزينْ

مينة كِيَّة مَجْروحَة

َمنْقوشْ بكاها عَ الصّخَرْ وَ الطِّينْ

مينة ذاك الدَّمْ ِالا سالْ

من ذيك العَيْنْ الدَّامْيَة

مينة الجَرْحْ ِالا طالْ

مَكْوي بَ النَّارْ الحَامْيَة

مينة طيرْ مْهَرَّسْ جْناحُه

َمنْتوفْ ِلهْ الرِّيشْ

مْخَلَّطْ الَبْكا بَ نْواحُه

ما طْلَبْ غيرْ يَعيشْ

مينة حُگرَة الزمانْ الظَّالَمْ

و ظُلْمْ الزّمانْ الْحَگَّارْ

الڨلْبْ كْبيرْ مْسالَمْ

مصادَقْ للخيرْ صَبَّارْ

حَسَرْتي على ذاك الزِّينْ

مْسَرَّجْ بَ الْهَمّ حْروفُه

الڨدّ و الخَدّ وَ الْعينْ

نَطْلَبْ مَنْ الله نشوفُه .