حروف منقوشة ف الظلام من ديوان الحكرة
كتبهاعلي مفتاح ، في 22 يوليو 2008 الساعة: 14:57 م
حْرُوفْ مَنْقُوشَة فَ الظْلامْ
فْ اليُومْ العالَمِي للْكَرَامَة
نَظّمَتْ لْ راسِي تَكْرِيمْ مْنََوّرْ
رَكَّبْتْ لْ فُمِّي كْمَامَة
وَ قْطَعْتْ لسانِي لِي كَيَهْضَرْ
حْجَرْ الَّدْنَيا وَ هْمُومْهَا
مْرَاكْمَة فُوڨْ الصْدَرْ
حَرْ السْمَا وُ شومْهَا
يَكْوِي وَ يَعْمِي الَبْصَرْ
النَّارْ فْ الرَّاسْ تَڨدِي
وُ ڨلبِي مَسْكِينْ يا وَعْدِي
شاعْلة عْوَافِيهْ
سالَى وَ تْقَاضَى جَهْدِي
وَ أنا يَا حَسْرَة وَحْدِي
جُرْحِي شْكُونْ يَدَاوِيهْ؟
جُرْحِي فْ الظْهَرْ مْصَدِّي
وَ الهَمْ مَحْفُورْ فْ جَلْدِي
وَ تَنْوَاحِي شكونْ سْمَعْ لِهْ؟
لَوْ كانْ الحَلْ بِ يَدِّي
كُنَتْ نَفْسَخْ جَلْدِي
وَ النَّاسْ تَدْفَ بِهْ
وَ ذاكْ الظَّالَمْ الَمْعَدِّي
نْشَعَّلْ فيهْ نارْ حَقْدِي
وَ ب ْيَدِّي نَشْوِيهْ.
الَبْكَا وْرَا الْمَيَّتْ خْسَارَة
وَ الزْيَادَة مَنْ رَاسْ الَحْمَقْ
اِلا الخَيَّالَة دَكَّتْ الَعْمَارَة
الَمْكَاحَلْ بَ البَارُودْ تَطْلَقْ
حْمَارِي وُقَفْ فْ العَڨبَة
وَ عْطَى حْمَارُه
تَقَوَّسْ ظَهْرُه فْ الشَّعْبَة
وَ تَخْلاتْ دارُه
رْكَلَتْ حْمَارِي وَ نْغَزْتُه
ڨلتْ لِهْ : سيرْ بِيَ يا الَحْمَارْ
مَنْ فَقْصْتِي عْلِيهْ رْكَلْتُه
ڨالْ لِيَ : شْكُونْ فينا الَحْمَارْ !
الْحَبْسْ وَ السِيلُونْ
التَّعْلاقْ بَ الشّيفونْ
الْعَلْفْ بَ الرَسْيُونْ
وَ الحَقْ ڨالُوا مَطْحُونْ
الفَلَقَة وَ التَّعْلاقْ
وَ الشِّيفُونْ مَعْفُونْ
الرُّكْنَة وَ الْغَبَّاقْ
وَ الحَبَسْ مَسْكُونْ
الجَّلْدْ اِلا طاقْ
وَ المَلَحْ مَذْهُونْ
يَزِيدُوهْ التَّعْلاقْ
حتّى الجَّهَدْ يَخُونْ
جَهْدَكْ قليلْ يا حُمَّانْ
وَسَطْ غابَة طْيُورْهَا نْسُورَة
وَ الضُّعَفْ فِيكْ اِلا بَانْ
مْعَذَّبْ ذاتَكْ مَضْرُورَة.
كَبْلُوهْ وَ حَزْمُوهْ مَنْ اليَدِّينْ
بَ الخَيَشْ غَمْضُوا لِهْ الْعَيْنِينْ
عَرَّاوَهْ وَ بَانْ المَسْتُورْ
رَشُّوهْ بَ مَاء بَايَتْ فْ الڨَمْرَة
مْحَابْسِي بَ الذَّلْ مَحْگورْ
ما غَطَّاوَهْ مَا سَتْرُوا لِهْ عَوْرَة
الرَّعْدَة ، الحُگرَة وَ قَلَّة الجَّهْدْ
الظُّلْمْ وَ القَهْرَة مَا لِهُمْ حَدْ
الفَلَقَة تَعَلْمَكْ تَحْبُو
وَ تَفَكْرَكْ فْ ايَّامْ الرْضَاعَة
تَعَلْمَكْ تْوَلِّي كَلْبُه
تَنْبَحْ وَ كُلَّكْ طاعَة
وَ تَبْرَكْ وَحْدَكْ يَا مَسْكِينْ
الدَصْ، الجُّوعْ وَ الَبْرُودَة
اِلا وْقَفْتِ ما تَلْقَى رَجْلِينْ
تَقَلَّدْ فْ وُقُوفَكْ الَقْرُودَة
سَطْلَة صْغِيرَة مَنْهَا تَشْرُبْ
وُ فيهَا تَقْضِي الحَاجَة
الصُّورْ عالي لا تَفَكَّرْ تَهْرُبْ
راكْ فْ نْهَارَكْ تَوَلِّي خْرَاجَة
الظَّلْمَة لِيلْ وَ نْهَارْ
الفَارْ وَ الرْتِيلَة جِيرانَكْ
تَحْكِي لِهُمْ ما صارْ
سَرْ الكَيَّة وَ مْحَانَكْ
ما تَعْرَفْ ليلْ مَنْ نْهَارْ
ما تَفْرَزْ حْرُوفْ جَلاَّدَكْ
فْ حَبَسْ انْتَ وَ لاَّ فْ غارْ
وَ لاَّ بْعِيدْ عْلىَ بْلادَكْ
اِلا بْغَى يَبْرَكْ …
ما يَصِيبْ ڨاعْ يَبْرَكْ عْلِيهْ
اِلا كْتَابْ وَ تَحَرَّكْ
لَحْمُه بَ الَعْصَا يَوْجَعْ فِيهْ
ايهْ علْيِكْ يا دَنْيَا
وَ ْعَلى غَدْرَكْ
تَكْوِي بْحَالْ الحَيَّة
وَ السَمْ مَنْ شَرَّكْ
وَ فْ هذا الزْمَانْ …
كُلْهَا وُ فينْ جَاتُه
شي راكَبْ عَ الَمْحَانْ
شي الَمْحَانْ عَيَّاتُه
شي بايَتْ عَرْيَانْ
شي دافي فَ كْسَاتُه
شي غادي حَفْيَانْ
شي مَسَبَّطْ فْ جْرَاتُه
ايهْ عْلِيكْ يا حُمََّانْ !
وُ فينْ رَاڨدْ اليُومْ
الظَّلْمَة وَ التَّخْمَامْ
وَ الهَمْ فِيكْ مَرْدُومْ
الفَلَقَة وُ الَعْصَا
وَ الذَّلْ فيكْ نَخْصَة
نابْتَة فْ الَعْرُوقْ
الڨلبْ بِهَا مَشْنُوقْ.
بْرَكْ فْ الظلْمَة …
يَرَارِي بَ اليَدْ جْرَاحُه
يَتْخَيَّلْهَا حَلْمَة
مَطْلُوقْ فيهَا سْرَاحُه
وَ سْمَعْ كلامْ وْرَا الَحْيُوطْ
وَ عْرَفْ شكونْ هُوَ
هذا الباشا ذاكْ المَسْخُوطْ
على بابُه نْطَقْ وَ دْوَى :
۔ فينَكْ يا الَحْمِينْ
وَ فينْ الزْعَامَة
رَدِّيتْ لِكْ الدِّينْ
وَ شَرَّبْتَكْ النْدَامَة
وَرِّيتَكْ وَ وَرِّيتْ جْمِيعْ النَّاسْ
كيف يَعَرْفُوا قيَاسْهُمْ
ما يَطَمْعُوا فْ ذْهَبْ وَ لا مَاسْ
يَحَلْمُوا عْلَى ڨدْ لْبَاسْهُمْ
وَرِّيتَكْ النَّخْلَة تَبْقَى نَخْلَة
وَخَّا يَطِيحْ جْرِيدْهَا
وَ العَتْلَة تَبْقَى عَتْلَة
يَرْشَى وَ يَصَدِّي حْدِيدْهَا
وَرِّيتَكْ وُ مازالْ نْوَرِّيكْ
وَ الا بْرِيتِي نَزِيدَكْ وُ نَعْطِيكْ
انا هْنَا بَاسْمِيَّة الَفْرَنْسِيسْ
فْ هذا الدُوَّارْ حَاكَمْ
كُلْ شِي بْ ثَمَانْ ، غالِي وَ لاَّ رْخِيصْ
رْوَى كلامِي يا الفَاهَمْ
وَ انْتَ يا الَحْمِينْ التَرَّاسْ
مَا حْصَدْتِ غيرْ صْدَاعْ الرَّاسْ
الَكْسِيبَة لِي شَڨاتْ طريقْ الَعْزِيبْ
اليُومْ رْجُوعْهَا للدُوَّارْ
وُ الَبْنِيّة لِّي كُنْتِ عَنْدَهَا حْبِيبْ
غَدّا زْواجْهَا مَنْ العَطّارْ
وُ ذوكْ الرْفَاڨ يا الَحْمِينْ
لِي بَ كلامَكْ سَابُوا
بَاسُوا الرْجَلْ وَ اليَدِّينْ
وُ ڨدَّامْ الجْمَاعَة تَابُوا
وَ بَقِيتِي وَحْدَكْ يَا مَسْكِينْ
جَفَّافْ هذا الَمْكَانْ
الظلامْ رْفِيقَكْ يَا الَحْمِينْ
تْفِيقْ وَ تْتبَاتْ بَ لَحْزَانْ
لِي مَا عَنْدُه هَمْ
تَوَلْدُه لِهْ حْمَارْتُه
لِي وْعَى فْ الدَّنْيَا وَ فْهَمْ
تَخْرُجْ عْلِيهْ فْهَامْتُه
-اليُومْ انَا بِينْ يَدِّيكْ
وَ شُوفْ آشْ يَلِيقْ
الظُّلْمْ ما غْرِيبْ عْلِيكْ
وَ الحُگرَة فِيكْ طريقْ
راسِي لِكْ مْدَلِّي
وُ سَوْطَكْ عْلَيَّ مْعَلِّي
وُ أنا وَسْطَكُمْ ضْعِيفْ
فْ هذا الزُّوبْيِة مَجْلِي
مْشَايَا بَ الَحْفَا مْتَلّي
وَ انْتَ الحَاكَمْ مُولْ السِّيفْ
جْلَدْ وَ ضْرُبْ
وَ لاَّ لوحْ لَحْمِي للَدْيِابْ
مَصْ دَمِّي وَ شْرُبْ
وَ لاَّ دْفَنِّي حَيْ فْ التْرَابْ
هِيَ بْرِيَّة كانْ عْلِيَ نْوَصَّلْهَا
تَمَنَّيتْ تكونْ وَصْلَتْ
هِيَ طْرِيقْ كانْ عْلِيَّ نْكَمَّلْهَا
وُ يا حَسْرَة ما كَمْلَتْ
كانْ مُرادِي تَحَسْ بَ الخُوفْ
حْبَلْ عْلَى عَنْقَكْ مَلْوِي
كانْ مُرَادِي تَحَسْ وَ تْشُوفْ
كيفْ الظلمْ فْ النَّفْسْ يَكْوِي
كانْ مُرَادِي النُّقْرَة بِينْ صْبَاعَكْ
يَذُوبْ نْقُوشْهَا
الحُگرَة تَحْبُو وَ تْدُقْ فْ بَابَكْ
وَ تْشَمْ عْرُوشْهَا
تْمَنّيتْ ليلَة وَ ليَالِي
تَعْرَفْ الجُّوعْ مَنْ الشَّبْعَة
تَلْبَسْ التُّوبْ البَالِي
وَ تَعْرَفْ سَرْ القَنْعَة
تْمَنِّيتْ تَعِيشْ بْحَالِي
تْحَسّ بَ الظّلمْ وَ الدَّمْعَة
ساكَنْ فْ عُشْ خَالِي
لا خُبْزْ حافِي لا شَمْعَة
تَمَنّيتْ تَلْبَسْ نْعَالِي
وَ دْرَابَلْ بَ الخِيشْ مْرَقْعَة
وُ نَعْطِيكْ الڨلبْ دْيَالِي
حتى تَحَسّ بَ الوَجْعَة
تَمَنِّيتْ تْحَسّ بَ الذَّلْ
مَرَّة وَ ثْنِينْ
مْعَرَّشْ فْ الڨلبْ وُ الَعْقَلْ
وَ يَطُلْ مَنْ العَيْنْ
تَمَنِّيتْ لَوْ واحَدْ فْ الدُوَّاْرْ
سِيدِي وُ مُولايْ وُ لالَة
يَسَمْعَكْ عْيُوبَكْ بَ الَجْهَارْ
وَ تَسْمَعَهَا فْ وَذْنِكْ كَلْمَة ًلا ً
أنا ما بْغِيتْ ذْهَبْ
ما بْغِيتْ جْنَانَاتْ
بْغيتْ حَقّي لِي تَسْلَبْ
وُ حَقْ بُويَا لِي مَاتْ
بْغِيتْ جْمِيعْ نَاسْ الدُوَّارْ
الجُّوعْ مَا يَعْرَفْ لِهُمْ طريقْ
و الحَقْ فْ عْيُونْهُمْ اِلا طارْ
ما يَرْضَاوْا بْ ذَلْ الَحْقِيقْ
حَقْ كامَلْ مَكْمُولْ
ماشِي حْقَيَّقْ مَذْلُولْ
تْمَنِّيتْ وَ بْغِيتْ
و الله ڨالْ كلامُه
يَغْفَرْ لِيَ اِلا عْصِيتْ
انَا رَاضِي بَ احْكامُه
عالَمْ بَ الڨلبْ وُ ما فِيهْ
وُ عالَمْ بَ دْوَاخْلِي
مَكْتَابُه أنَا رَاضِي بِهْ
يَغْفَرْ لِيَ اعْمَالِي
وَ انْتَ يا الباشا مَزْوَارْ
الظلامْ فْ نْهَارَكْ لابَدْ يَوْصَلْ
تَلْبَسْ كْفَنْ الحَفَّارْ
وَ فْ يُومَكْ تْوَدِّي وُ تَحْصَلْ
قْطَعْتِي الوَادْ وُ نَشْفُو رَجْلِيكْ
وَ حْسَبْتِي رَاسَكْ سَاَلكْ
فْ يُومْ المُوتْ جَايْ يَدِّيكْ
تْفَكَّرْ الَقْبَرْ خَلِّيهْ فْ بَالَكْ
وُ اِلا مَاتْ حُمَّانْ وَ لاَّ عَدْمُوهْ
قادْرَة الارْضْ تَنْبَتْ غِيرُه
وُ اِلا سَمْعُوا كلامِي وُ فَهْمُوهْ
ُظلمَكْ فْ يُومْ يَلقََى مْصِيرُه
نَقَشْتِ فْ كُلْ بَابْ وُ بَابْ كِيَّة
رَضَّاعَة تَلْهِيهُمْ
تَرْخَفْ وُ تُكْرَزْ الَحْبَلْ
اِلا حَلُّوا العَيَنْ تَعْمِيهُمْ
بِيرَكْ يا كْبِيرْ الڨَعْدَة مَسْمُومْ
لا دْلُو لا حْبَلْ لا جَرَّارَة
وَجْهَكْ فء التَّارِيخْ مَدْمُومْ
رْفِيڨْ بَنْ عَرَفَة وُ بُو حْمَارَة
غَدّاَ تَزُولْ هَذِه الغُمَّة
وَ مَنْ بْلادْنَا يَخُرْجُوا الَفْرَنْسِيسْ
تَطْلَعْ الشَّمْس وَ تْطِيرْ الظلمَة
وَ تْبَعْ سْيَادَكْ لْ بارِيسْ
غَدّا تَرَكْبَكْ الغُرْبَة
و انْتَ فْ بْلادَكْ
طاعونْ جْدَامْ وُ جَرْبَة
وُ يَنَكْروكْ احْبَابَكْ
غَدَّا نَبْنِيوْهَا طوبَة وَ حْيُوطْ
وَ الوَقَتْ تَزْيَانْ
يَتْنَڨى ترابْهَا مَنْ الرْهُوطْ
وَ الحَقْ يَبَانْ
لله يا هذاكْ خَايَبْ الحَالَة
تَتْسَلْطَنْ وَ مْصِيرَكْ للَزْوَالَة
شْبَرْ مَنْ تْرَابْ الارَضْ
وَ تُوبْ بْيَضْ مَنْ الَكْفَنْ
المُوتْ عْلِيكْ فَرَضْ
تْمُوتْ ذليلْ وُ مْعَفَّنْ
ظَلْمَة الَقْبَرْ وُ الَحْسَابْ
لا شْكَارَة لا سُلْطَة لا احْبَابْ
صَمْتْ وُ ظلامْ الَقْبَرْ
وُ دُودُه مَنْ عُودُه
مَحْسُوبْ كلامَكْ وَ النْظَرْ
وَعَدْ الله وَ وْعُودُه
- المُوتْ راحَة لْ عْذَابَكْ
لازَمْ نَخَلِّيكْ مْعَذَّبْ
ما تَشُوفْ ما تَلْقَى احَبَابَكْ
عايَشْ فْ بْلادَكْ وُ مْغَرَّبْ
كُلْ يُومْ عذابْ شْكَلْ
حتَّى تتُوبْ وَ لا تَذْبَلْ
الجُّوعْ وُ الَعْفَنْ
وَ الشَّمَسْ ما تْشُوفْهَا
المَرَضْ فِيكْ يَسْكُنْ
وُ نَفْسَكْ تَحْمَاقْ من خوفها .
- أنَا كْتَابْ يَتَقْرَا
حْرُوفُه خَوْفْ وَ عْذَابْ
سْطُورُه عَافْيِة جَمْرَة
وَ وْرَاقُه بَاهْتَة ضْبَابْ
أنا قْصِيدَة مَا لِهَا مِيزانْ
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
