النَّاسْ نُقْرَة وَ نْحَاسْ

 

راسِي مْشَحّمْ شَلَّة أفْكَارْ

ثَقَّلْ عْلِيَّ وَلّيتْ حْمَارْ

بَ الفَقْصَة نَمْضَغْ الَكْلامْ  بَ هْمُومْ

وَ فْ خْرُوجُه يَتْعَصَّرْ فُمّي المَعْصُومْ

 

 

 

الْحَرْثْ فْ الرَّاسْ

وَ الَحْصَادْ فَ الڨلبْ

بَ الَمْدَرَة وَ الفَاسْ

حتَّى الرَّاسْ تَغْلَبْ

 

الغَلَّة شُوكْ

بَ الهَمْ مَحْسُوكْ

 

وَ النَّاسْ هِيَ النَّاسْ

مَرَّة قَصْدِيرْ مَرَّة نْحَاسْ

تَشْرَبْ الهَمْ وَ لِيَّاسْ

وَ تَذُّوقْ الَمْرَارْ بْلا قْيَاسْ

  

هذا تُوبُه عْلَى ڨَدْ جُوعُه

وَخَّا الجُّوعْ يَعَشَّشْ فْ ضْلُوعُه

 

وَ الطِّيرْ الحُرْ ما يَبِيعْ تُوبُه

ما يَڨْلَبْ قَشَّابَة

ما يَسَمَّرْ نْعَالَة فْ هْرُوبُه

ما يَكَحََّل بَ ضْبَابَة

 

ما يَخَلِّي الجُّوعْ بَ الّلجَامْ

يَرْكَبْ عْلِيهْ

ما يَخَلِّي لڨْمَة الَحْرَامْ

فْ الَحْلالْ تَنَّسِيهْ

 

الطِّيرْ الحُرْ، ما يَغَمَّضْ عَيْنْ

وَ يَڨولْ: راسِي يا راسِي

نُقْرَة صَافْيَة وَ ڨلَبْ حْنِينْ

يَڨولْ: ناسِي يَا ناسِي

 

هُوَ دَگْ مَنْ نُقْرَة

ضاعَتْ فْ هذا الزْمَانْ

بَ ظُلْمْ النَّاسْ وَ الحُگْرَة

قَلَّة العَفَّة وَ الَحْسَانْ

 

وَ النَّاسْ هِيَ النَّاسْ

مَرَّة قَصْدِيرْ مَرَّة نْحَاسْ

 

وَ الذْهَبْ فْ مَعْدَنْ بنادَمْ قْلِيلْ

القَصْدِيرْ وَ الصْدَا وَ الَبْهُوتْ يَسِيلْ

 

الجُّوعْ وَ قَلَّة الشِّي

يَصَدِّي الَعْقَلْ وَ يَرَشِّي

 

و الصُّقْلَة فْ سُوقْ الكِيَّالَة

تابَعْ وَ مَتْبُوعْ وَ عْمَالََة

 

الجُّوعْ يَقَوَّسْ ظْهَرْ مُولاهْ

حتىَّ يَبُوسْ الرُّكْبَة

يَعَلْمُه التْمَلْحِيسْ فْ سْعَاهْ

وَ كيفْ يَمْسَحْ العَتْبَة

 

الجُّوعْ غولْ  كَ يَتْسَيَّفْ

مَرَّة قانَعْ مَرَّة مْهَيَّفْ

 

جُوعْ النَّفْسْ وَ جُوعْ الشْكَارَة

مْخَيَّطْ بَ المَالْ وَ مْرَقَّعْ بَ قْصَارَة

 

و الجُّوعْ نْسَرْ ظْفَارُه طْمَعْ

يَعَشَّشْ ،يَبَيَّضْ وَ يَفرَّخْ سْبَعْ

 

وَ السْبَعْ سْبَعْ

ما يَقْنَعْ ما يَشْبَعْ

 

وَ الدَّنْيَا هَذِه غابَة

اِما صَيَدْ وَ لاَّ صَيَّادْ

فيها النَّفْسْ غَلابَة

اِما عَبْدْ وَ لاَّ جَلاَّدْ

 

وَ النَّاسْ هِيَ النَّاسْ

مَرَّة قَصْدِيرْ مَرَّة نْحَاسْ

 

هذا بَ لْجَامْ …وَ هذا بْ كلامْ

هذا مَسْمُوعْ…و هذا مَرْفُوعْ

 

وَ ّسْر الَحْكَايَة فْ الجِّيبْ

يَخَلِّي الْعَتْرُوسْ يَوَلِّي ذيبْ

يَزِيدْ النْيَابْ عَ الَڨرُونْ

وَ فْ ظُلْمْ النَّاسْ يَوَلِّي مَفْتُونْ

 

وَ سُبْحَانْ الواحَدْ التَوَّابْ

خْلَقْ خَلْقُه مَنْ طينْ وَ تْرَابْ

  

طينْ مْصَلْصَلْ بْحَالْ الفَخَّارْ

العَيَنْ وَ اللسَانْ وَ الَعْقَلْ فَكَّارْ

وَ سْرَحْ بنادَمْ فْ الدنْيَا يَتْسَلْطَنْ

يَدُورْ، وَ للتْرَابْ يَرْجَعْ مْكَفَّنْ

 

وَ الَكْفَنْ تُوبْ بْلا جِيبَ بْلا شْكارَة

وَ القْبَرْ شْبَرْ ما فيهْ لا جِيبْ لا قْصَارَة

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج