كرهت راسي
كتبهاعلي مفتاح ، في 22 يوليو 2008 الساعة: 14:17 م
كْرَهَتْ الظُّلْمْ وَ الظَّالَمْ
كْرَهَتْ عِيشَة « عَدِّي »
كْرَهَتْ الْمَحْگورْ وَ الحَالَمْ
كْرَهَتْ الدْرَاعْ الَمْصَدِّي
كْرَهَتْ الجْنَاحْ الَمْهَرَّسْ
كْرَهَتْ قَلَّة الحِيلَة
كْرَهَتْ الفُمْ الَمْفَرْنَسْ
يَضْحَكْ ضَحْكَة ذْلِيلَة
كْرَهَتْ القَشَّابَة المَڨلوبَة
كْرَهَتْ الْغَمْزَة بَ التْمَحْلِيسْ
كْرَهَتْ الرُّجْلة المَعْيُوبَة
كْرَهَتْ الضَّحْكَة بَ التْفَرْنِيسْ
كْرَهَتْ الرَّاسْ الَمْطَاطِي بَ الخُوفْ
كْرَهَتْ العُنُقْ الَمْدَلِّي
كْرَهَتْ لِي يَتْفَرَّجْ وَ يَشُوفْ
كِيفْ حَقُّه مْتَلِّي
كْرَهَتْ الغَارَقْ فْ الدُّوخَة
ڨالْ :يَنَسَِّي الَهْمُومْ
عايَشْ عِيشَة مَمْسُوخَة
عْلَى كْلامْ الحَقّ مَفْطُومْ
كْرَهَتْ الدَّاَخَلْ سُوقْ راسُه
ضَارَبْ الدنيا رَكْلَة
غارَقْ وَ زايَدْ فْ نْعَاسُه
مَعَشَّة فْ لسَانُه خَمْلَة
لِّي زْرَعْ الخُوفْ يَحْصَدْ الذَّلْ
وَ الَبْكَا وْرَا الحَقْ خْسَارَة
الزِّيَادَة ڨالُوا مَنْ رَاسْ الَبْغَلْ
رْكَلْ النَّعْمَة وَ تْبَعْ الَحْمَارَة.
تَمَنِّيتْ يَا سِيدْ الوَالِي
يَتْبَدَّلْ هذا الحَالْ
تَمَنِّيتْ النَّاسْ بْحَالِي
ما تَعِيشْ عِيشَة الَبْغَالْ
تَمَنِّيتْ الصَّابَة وَ الغَلَّة
تَسْكُنْ رِيقْ ذاكْ الجِّيعَانْ
تَزُولْ هْمُومْ هذه العَلَّة
الَحْزِينْ فينا يَبَاتْ فَرْحانْ
تَمَنِّيتْ السَّاڨيَة بَ النُّوبَة
وَ الحَرْثْ بِينا مَشْرُوكْ
الَعْوِينْ حَاجَة مَطْلوبَة
وَالعَدْلْ بينا مَدْرُوكْ
تَمَنِّيتْ الْمَنْجَجْ يَصَالَحْ قُرْشَالُه
الصُّوفْ الْمَدْزُوزَة تَدَفَِّينَا جْمِيعْ
لِي طْمَعْ فْ دْيَالْ النَّاسْ يَخَلِّي دْيَالُه
وَفْ عِيشَة الَحْرَامْ رَاهْ يَضِيعْ
حَقْ الجَّارْ عْلَى الجَّارْ
ياكْ دَمْ وَاحَدْ يَجْرِي فِينَا
العَدْلْ بينا اِلا طَارْ
نَصَلِّيوْا الجْنَازَة عْلِينَا
لَوْ كانَتْ لِيََّامْ يا سيدي مْسَگدَة
لَوْ كانَتْ النّفُوسْ بَ الكَلْمَة مْوَگدَة
ما كان الجْدِي يَلْبَسْ تُوبْ الذِّيبْ
وَ مُولْ الفَدَّانْ فْ بْلادُه يَوّلِّي غْرِيبْ
لَوْ كانَتْ لِيَّامْ يا سيدي مْسَگدَة
وَ اليَدْ فْ اليَدْ عْلَى الظُّلْمْ وَحْدَة
ما كانْ السَّوْطْ يَصِيرْ حْزَامْ
وَ الجُّوعْ فْ الفُمْ يَصِيرْ جْدَامْ
لَوْ كانَتْ لِيَّامْ يا سيدِي مْسَگدَة
وَ النَّاسْ لْعَشْرَة الطّعَامْ مْفَگدَة
ما كانْ الخُبْزْيَوَلِّي حَلْمْ
وَ الجْرَى وْرَاهْ يَوَلِّي ظُلْمْ
لَوْ كانَتْ لِيَّامْ يا سيدي مْسَگدَة
وَ النَّاسْ ما تَبْقَى بَارْكَة مْقَرْضَة
ما كانْ السَّوْطْ يَسْرَحْ فْ الظّهَرْ
وَ بنادَمْ يَتْسَاڨ بْحَالْ الَبْڨَرْ
لَوْ كانَتْ لِيَّامْ يا سيدي مْسَگْدَة
و النَّاسْ عَلى الظُّلْمء ما مْبَرْدَة
ما كانْ النْسَرْ يَبْرَدْ الظْفَارْ
يَخْطَفْ بَ الغَفْلَة دِيمَا غَدَّارْ
علي مفتاح
من ديوان الحكرة
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
