- أنَا كْتَابْ يَتَقْرَا    

            حْرُوفُه خَوْفْ وَ عْذَابْ

            سْطُورُه عَافْيِة جَمْرَة

            وَ وْرَاقُه بَاهْتَة ضْبَابْ

            أنا قْصِيدَة مَا لِهَا مِيزانْ

            خاوْيَة مَنْ الْمَعْنَى

            ما لِهَا لُغَة ما لِهَا اوْطانْ

            السَّرْ فِيهَا مَنْ المَحْنَة

            أنا لوحَة الْوَانْهَا بَاهْتَة

            مَرْسُومَة فْ الظلامْ

            صُورَة تَنْطَقْ وُ هِيَ سَاكْتَة

            بَكْمَة وُ كُلْهَا كلامْ

            أنا شَجْرَة وَسَطْ غابَة

            ما فيها اغْصَانْ ما تَعْطِي ظَلْ

            النَّاسْ فيهَا حَطَّابَة

            حتّى جْذُورْ ڨلبَهَا ذْبَلْ

            أنَا بِيرْ بَ الدَّمْعَة مَحْفُورْ

            مَنْ الڨاعْ خَاوِي

            لَّي شْرَبْ مَنْ مَايَا مَضْرُورْ

            وُ لِي بَعَّدْ يَبْقَى رَاوِي

            أنا قْبَرْ لِي تْعَذَّب وُ مَاتْ

            وُ مْشَى مْع الرَّيحْ

            فْ الشَّاهَدْ يَدُّه كَتْبَاتْ

            « وَقَتْ آشْ الظلمْ يَطِيحْ »

            أنَا نَخْلَة تْمَرْهَا ڨطْرانْ

            وَ جْرِيدْهَا عْذَابْ

            ريقْها لاكَحْ عَطْشَانْ

            تَعْطِي الدْمُوعْ بْلا حْسَابْ

            أنا عَيَنْ ذاكْ المَضْيُومْ

            الَمْخَاصْمَة جُوفُه اللڨمَة

            فْ الخُبَزْ الحَافِي مَغْرُومْ

            مْقَاتَلْ عَ النَّعْمَة

            أنَا كلمَة مَعْجُونَة مْعَانِي

            مْرَايَا لْ كُلْ مَسْكِينْ

            لِّي فْ عِيشْتُه ما هَانِي

            ليلُه مْعَ نْهَارُه حْزِينْ

            الدَّنْيَا أرْقامْ وُ حَسْبَة

            مَرَّة تَزِيدْ مَرَّة تَنْقُصْ

            اِلا جَعْتِ تْوَلِّي كَذبَة

            وُ اِلا حْلَمْتِ تْبَاتْ فْ الدَّصْ

            دَقْ فْ بَابِي وُ ڨلْتْ : شْكُونْ

            ڨالْ لِيَ : أنَا زَهْرَكْ رَاجَعْ

            ڨلتْ لِهْ : أنَا زَهْرِي مَسْجُونْ

            وُ فْ ضَوْ الحُرِيَّة طامَعْ.