الدَّنْيَا الْمَحْگورَة

 

ڨرُونَا فْ الدَّنْيَا ڨرُونْ سَرْدِي

اِلا تْهَرَّسْ الاوَّلْ ، غِيرْ عَدِّّي

و ِالا سَوَّّسْ الثانِي ، تَمَّة تْوَدِّّي

تَتْمَنَّى المُوتْ وَ تڨولْ : يَا دَنْيَا غَدَّارَة غِيرْ بَعْدِي

 

 

 

هِيَ دَنْيَا وَ لُوحَة…

مَرْسُومَة بْ شَلَّة ألْوَانْ

كَيَّة مَجْرُوحَة

مْصَادْقَة طريقْ الَمْحَانْ

 

عَيْطَة مَبْحُوحَة

تَرْوِي غْرَايَبْ الانْسَانْ

كلمة مَڨرُوحَة

شَجْرَة بَ جذورْ وَ اغْصَانْ

 

هِيَ دنيا …

وَ حْنَ صْحَابْهَا

الرُّوحْ فانْيَة …

تَحْتْ تْرَابْها

 

 

 

هي سْحَابَة تْغَذِّي الَعْرُوقْ

وَ تَعْطِي الطُّوفانْ

شَمْس وَ خْيُوطْهَا شْرُوقْ

وَ الجُّوفْ مَنْهَا لَكْحَانْ

 

هِيَ عْجَاجَة اِلا طَلَّتْ

هِيَ عَافْيَة اِلا شَعْلَتْ

 

الدَّنْيَا بَكْمَة

وَ ُكلْهَا كْلامْ

الدنْيا حَكْمَة

مَنْقُوشَة فْ الَغْمَامْ

 

هِيَ جْبَالْ … بَ صْخُورْ

هِيَ رْمَالْ … بَ بْحُورْ

 

هِيَ وَ الزّمَانْ

زُوجْ خُّوتْ

الفَرْحْ وَ الَمْحَانْ

الَحْيَاةْ وَ الْمُوتْ

 

 

 

 

يَخْرُجْ ذاكْ المُولودْ…

بينْ دْرَاعْهَا مَلفُوفْ

يَتْوَهَّمْ رَاسُه مَخْلودْ

يجُولْ فْ دْرُوبْها وَ يَطُوفْ

 

فْ كُل جُولَة وَ جُولَة

يَتْقَوَّسْ ظََهْرُه

يَذْبَالْ عُودْ السّبُولَة

وَ يَحْفَرْ قَبْرُه

 

َيتْلَعْتَمْ وَ يَنْطَقْهَا كَلْمَة

وَ يَتْقِيَّا مَنْ فُمُّه الَحْرُوفْ

تْعَرِّي لِهْ صَدَرْهَا مْسَلْمَّة

يَنْقُشْهَا بْ الَخْنَاجَرْ وَ السّيُوفْ

 

حْنَ اصْحَابْها …

وَ مَنْهَا جِينَا

نْتَلْفُوا فْ حْسَابْهَا

وَ جُوفْهَا يَفْنِينَا

 

الظُّلْمْ فِينَا بَ ڨرُونْ سَرْدِي

وَ الْحُگرَة شْوَارِي وَ بَرْدَعَة

بنادم فيها ظالَمْ مْعَدِّي

وَ الضِّيمْ فيها دَمْ ماشي دَمْعَة.

 

يَكْبَرْ الَوْلِيدْ الصّغِيرْ

و يَطْوَالْ عُودُه

يَحْصَدْ شَرّ وَ خِيرْ

و يَرْسَمْ حْدُودُه

 

يمُوتْ عَ الَبْلادْ

وَ يرَبِّيهَا لَّلاوْلادْ

 

كيفْ يشُوفُوهَا جَمْرَة

شاعْلَة فْ حْجَرْ الطَّامَعْ

اِلا كْوَاتْهَا الحُگرَة

ديما لَ غْوَاتْها سَامَع

 

السَّوْطْ وَ الْكُمِيَّة تَحْتْ لْبَاسُه

القَهْرَة بَ الصّبَرْ بَرْدَعَة فْ رَاسُه

 

صَوْتُه مَهْزُوزْ عْلَى كْفُوفْ الّريَّاحْ

ما هو غْوَاتْ مَا هُوَ نْوَاحْ

 

يَبْلَعْهَا جَمْرَة

يعُومْ بَ الحُگرَة

تَسْكُنْ فْ رِيقُه

الخَوْفْ شوكَة فْ طريقُه

 

 

يَتْلَفْ بينْ الجْنَانَاتْ

و بينْ ضَرْبَة السَّوْطْ  المَفْتُولْ

هِيَ دَنْيَا وِ اِلا كَرْهَاتْ

تْخَلِّي الحَقّ مَقْتُولْ

 

وَ يطِيحْ الحَلْمْ مَنْ داخَلْ وَذْنِيهْ

و يَرْسَمْهَا لوحَة ڨدَّامْ عَيْنِيهْ

 

يشوفْ جْنَانُه يَبْكِي مَنْ الحُگرَة

وَ ترَابُه يشَهَّقْ مَنْ الحَسْرَة

يَهْبَشْ بَ يَذِّيهْ وَ يَحْفَرْ حُفْرَة

يَدْفَنْ سَرُُّ مْعَاهْ وَ يَدْفَنْ القَهْرَة.

 

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج