سْبُولَة الْخُوفْ لَمْعَرْشَة فْ الجُّوفْ

وْقَفْتْ ڨُدَّامْ الَمْرَايَا

شَفْتْ وَجْهِي وَ رْكَبْنِي الخُوفْ

غَوَّّتْ(5) غَوْتَة، تْهَرْسَتْ الَمْرَايَا وْ طاحُوا الشقُوفْ

شَفْتْ فِيهَا مَنْ جْدِيدْ، لْقِيتْ ثلاثة العَيْنِينْ وَ قْلالْ الشّوفْ

سَتَّة الاذْنِينْ طْوَالْ وَ رَبْعَة النيُّوفْ،

وَ فُمْ وَاحَدْ مَسْدُودْ وَ مْكَفَّنْ بَ الصُّوفْ.

الَكْلامْ بْ رِيشَة الخُّوفْ مَرْسُومْ

وَ الَحْرُوفْ عايْمَة فْ مْدادْ مَسْمومْ

وَ النَّظْرَة بْ الَمْحَانْ مْشَبَّّكْ الْوَانْها

و النَّفْسْ غارْقَة فْ ذَلْ زْمَانْها

الحَرْفْ يْعَانَقْ الحَرْفْ

و بنادم مَمْنوعْ مَنْ الصَّرْفْ

هذا مَرْفُوعْ و هذا مَعْلولْ

و هذا بَ الجَّرْ نَعْتُه مَذلولْ

هذا فاعَلْ و هذا مَفْعولْ

فْ حالُه تابَعْ فْ سَرُّه مَقْتولْ

و الكلام فْ سوقْ الرَّّحْبَة ميزان

ُكلْها و كَيْلُه و كَيَّّالُه

الهَضْرة فْ الڨلْبْ مَعْبورَة بَ الَمْحانْ

وَ كُلْها يتّوْزَن بَ اعْمالُه