من ديوان الحكرة للزجال علي مفتاح
كتبهاعلي مفتاح ، في 19 يوليو 2008 الساعة: 22:45 م
بين الارض و السما نَبْتَتْ كَلْمَة
حروفها بْ الخوف وَلاَّت ضْبَابَة
مْغَطْيَة العين و الڨَلْبْ بِهَا مْكَمَّشْ وْرَا ضْلُوعُه
كلمة الحق سْواكْ وَ كُحْلْ يْزَيَّنْ الضَّحْكَة
عْبَانَة مَرْگُومَة(1 )بِهَا يَتْغَطَّاوْا الاوْلادْ
وَ الدَّنْيَا يَا حَسْرَة بَرْدْ مَسْمُومْ
و كلها يقلَّبْ على دْفاه
هذا يجُرْ …
و هذا يَنْتُرْ …
و هَذا يضُرّْْ…
تْنَسَّلْ الخَيْطْ وَ تْنَسْلاتْ مْعَاهْ الخَاوَة وَ الصُّحْبَة
تْمَضَّاتْ النْيَّابْ وَ تْنَقْشَتْ ب ْالعْظَامْ الجُُّورَة وَ الدَّمْ
المَسْكينْ… ذاكْ المَسْكِينْ رَاشْيَة عْظَامُه
عَشّ الرْتِيلَة رَاكَبْ عْلَى كْلامُه
و ذيكْ العْبَانَة تْفَرْقَتْ عَ الاوْلادْ
وْ ضَاعْ الحَقّ فْ دْفَاهَا
و ذيكْ الكلْمَة لِّي نَبْتَتْ ِبينْ الارض وَ السّمَا
غَطَّاهَا عْجَاجْ الطّمَعْ
وَ بْقَاوْا الاوْلادْ يْصَالْحُوا الحَرْفْ عَ الحَرْفْ
يْجَرُّوا «الحَا» وَ «القَافْ» مْعَفَّرْ
يجُرُّوا «القاف» «الحا» يَتْنَكَّرْ
وَ بينْ السّمَا وَ الارض ذاكْ الحَقْ اخْتَارْ يَحْفَرْ قَبْرُه
وَ شِي نَاسْ َمنْ ذُوكْ النَّاسْ، رَقْعُوا الَعْبَانَة بْ خْيُوطْ الحُگْرَة.
ذاكْ الخِيرْ طَجّْ مَنْ الگاعَة.
گصْعَة مْسَگيَة بْ ذَلْ سَبْعْ خْضَارِي
الدَّمْ مَنْخوضْ فْ شَكْوَة القَهْرَة
ذاك اللسانْ بْ طُولُه ڨَدِّيدَة فْ القَلُّوشْ(2)
سْمَنْ ڨاطَعْ بْ السْكاتْ راكَبْ عليه
لا كلمة لا تْزَغْرِيدَة لا لَحْسَة مَنْ عْزا المِيَّتْ
هي ايَّامْ كان فيها الخُوفْ يَتَّقْرَا
حروف باكية ما تَنْڨُطْ
هي ايَّامْ كان الذَّلْ وَ الفضيحَة بَ البَرَّاحْ
و فيها الحاضَرْ يَعْلَمْ الغايَبْ
و لّي طالَتْ غَيَبْتُه… يا حَسْرَة امِّّيمْتُه
تْرَابْ جْنَانُه يسَرَّجْ لْجامُه
يحَفْرُوا وَسْطُه شَلَّة طُرْقانْ
طريق الحُگرَة وَ طْريقْ التَّخْمَاسْ .
دوار «امِّّي حْليمَة» ، و « خَلْوَة مولايْ عْلِي البُوهَالِي»
الحَكْمَة بينْ الجْبالْ طالَعْ نورْهَا
الحَضْرَة بْكَا بْ الدّْمُوعْ مَنْ سْوَاكَنْ الحُگرَة
الظلم الَمْعَشَّشْ فْ الرَّاسْ يخَلِّيهْ يتْحَيَّرْ
يْدورْ وَ تدُّورْ الدنيا مْعَاه
الجَّمَرْ هْمومْ يمشي فوڨْهَا المَحْگورْ بَ الَحْفا
كُلْ خَطْوَة يتْفَكَّرْ الهَمّ السَّاكْنُه
وَ ذيكْ الرّْْجَلْ شلخة شاعْلَة عْوافي وْ كِيَّة
حَمُو مَزْوارْ الرَّاسْ الكبيرْ »»
مَنْ بَزُّولَة حْليبْهَا شَرْ وَ دَمْ رَاضَعْ حُگرَة و ظُلْمْ النَّاسْ
السَّوْطْ مَضْفورْ مَنْ شْعَرْ الْعَزْبَاتْ
مَنْ جَلْدْ لََوْلادْ الحَالْمِينْ بَ الُّلڨمَة الحَافْيَة وَ الجُّّغْمَة الصَّّافْيَة
هُوَ واحَدْ كانَتْ الحُگرَة فْ دْواخْلُه خْوَابي
و القَهْرَة فْ ظَهْرُه مْشَرْطَة بَ جْريحَة الليَالِي حَيَّانِي
هو واحد شرْقَتْ فْ دْوَاخْلُه ڨمْرَة الَبْدالَة(3)
حْلَمْها حَلْمَة بْ الخِّيرْ مْنجَّجْ خْيُوطْها
لا قَهْرَة لا حُگرَة لا ذَلّ يرَقَّعْ الضَّحْكَة وَ النَّظْرَة
«حُمَّانْ الَحْمِينْ» الظّْهَرْ مْبَرْدَعْ بْ هَمّ الدَّنْيَا
حْلَمْ حَلْمَة وَ عْلِيها مْشَى سَرََّجْ بِهَا الاكْتَافْ
و النَّظْرَة مَخْيَطْ لذيك وَ هذه الايَّامْ
لازَمْ عَشّ الرّتيلَة يْطِيحْ بْ عَيْطَة گارْحَة مَنْ اللسانْ
لازَمْ الخُبْزْ الحافِي ما يَبْقَ حَلْمَة صْعِيبْ عَ الاوْلادْ يْفَكُّوا حْرُوفْها
لازَمْ السَّوْطْ يَتْبَدَّلْ لْ ضَحْكَة مَرْسُومَة بْ الحُبّ وَ بْ الخِيرْ
لازَمْ الهْنَا يَلْڨى طْرِيقُه للڨلوبْ
لازَمْ…
لازَمْ…
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
نوفمبر 6th, 2008 at 6 نوفمبر 2008 12:56 ص
السلام عليك يا أخي,
أشكرك كثيرا على القصاءد المملوءة بالحكم والآمال. لقراءتها,أحسست بأن آهتمامك بالواقع الذي تمر به بلادنا,آهتمام عميق,لاشك بأن الظُلْمْ يمزق القلوب.
أشكرك أيضا على آهتمامك بالفن و الثقافة. وأهنأك على أسلوبك القيم والرقيق.
تحياتي
خالد
من الخميسات, ولكن أعيش اللآن بكيبك,كندا.